Një pjesë e pacientëve që e kanë kaluar COVID-19, vazhdojnë të kenë akoma probleme me mushkëri, dhe kjo e bën që në Klinikën e Pulmologjisë ngarkesa të jetë më e madhe, ka bërë të ditur pulmologu Besim Morina.
“Për fat të keq një pjesë e konsiderueshme e pacientëve që e kalojnë COVID-in vazhdojnë të kenë probleme me frymëmarrjen dhe e shohim që një pjesë e madhe e tyre pasi të kalojnë infeksionin vazhdojnë të kërkojnë ndihmë tek ne. Një pjesë e tyre nuk ju mjafton oksigjeni që e marrin, pra shpesh duhet të jepet oksigjen shtesë, pra mushkëritë e tyre asnjëherë s’e rifitojnë funksionin e tyre, kjo vlen për një grup të vogël të pacientëve që kanë pneumoni shumë të rënda ose që kanë pasur sëmundje shumë të rënda. Por edhe ata që nuk kanë pasur probleme të rënda vazhdojnë të ankohen prej pasojat e COVID-it”, ka thënë Morina në një intervistë për Ekonomia Online.
Sipas tij, një pjesë e atyre që e kalojnë koronavirusin ankohen për kollë të vazhdueshme, e një pjesë edhe për marramendje, dhimbje gjoksi e probleme të tjera në formë të djersitjes.
Ai ka shtuar se kohëzgjatja e anti-trupave varet nga organizmi i njeriut dhe se kanë pasur raste kur imuniteti disa personave u ka zgjatur vetëm katër muaj, ku si pasojë e kësaj kanë pasur infeksion për herë të dytë.
“Varet shumë prej organizmit, disa organizma që vazhdojnë të kenë një përgjigje më imune ndaj infeksionit ata krijojnë më shumë anti-trupa. Këta pritet që të kenë një kohëzgjatje më të madhe të anti-trupave. Një grup i pacientëve kanë një përgjigje më të vogël imune. Ne presim që 6 ose 8 muaj të jenë imun por ka ndodh që pas 4 muaj të kemi infeksion të dytë, varet nga personi. Po ashtu varet sa aktiv janë anti-trupat, pasi ka dikush që ka anti-trupa në gjak por nuk janë aktiv ndaj infeksionit”, ka deklaruar Morina./EO/
