Indonezia e ka quajtur kryeqytetin e saj të ri Nusantara, pasi ligjvënësit atje miratuan zhvendosjen nga Xhakarta në Kalimantan, një zonë e mbuluar nga xhungla në lindje të ishullit Borneo.
Emri i ri përkthehet në “arkipelag” në gjuhën indoneziane.
Shqetësimet për qëndrueshmërinë e qendrës politike të mbingarkuar dhe të zhytur me shpejtësi të Xhakartës, nxitën nevojën për një kryeqytet të ri, dhe Dhoma e Përfaqësuesve e Indonezisë miratoi zyrtarisht një projekt-ligj të martën në lidhje me zhvendosjen.
“Zhvendosja e kryeqytetit në Kalimantan bazohet në disa konsiderata, avantazhe rajonale dhe mirëqenie. Me vizionin e lindjes së një qendre të re ekonomike të gravitetit në mes të arkipelagut”, ka thënë Suharso Monoarfa, ministri i vendit për Planifikim të Zhvillimit Kombëtar.
Presidenti Joko Widodo njoftoi fillimisht se kryeqyteti do të zhvendosej në vitin 2019, duke përmendur shqetësimet për qëndrueshmërinë mjedisore dhe ekonomike të Xhakartës.
Xhakarta ndodhet në tokë moçalore pranë detit – duke e bërë atë veçanërisht të prirur ndaj përmbytjeve – dhe është një nga qytetet që fundoset më shpejt në Tokë, sipas Forumit Ekonomik Botëror. Ish-kryeqyteti ka rënë në detin Java me një shkallë alarmante për shkak të nxjerrjes së tepërt të ujërave nëntokësore.
Është gjithashtu një nga rajonet urbane më të mbipopulluara në botë. Ajo është shtëpia e më shumë se 10 milionë njerëzve, me rreth 30 milionë në zonën më të madhe metropolitane, sipas Kombeve të Bashkuara.
Të martën, projektligji për zhvendosjen e kryeqytetit u miratua nga tetë fraksione dhe vetëm një fraksion e refuzoi atë, sipas kryetarit të Dhomës së Përfaqësuesve të Indonezisë Puan Maharani. Parlamenti i Indonezisë përbëhet nga nëntë grupe partish politike të njohura si fraksione.
Ligjvënësit kanë theksuar rëndësinë e shqyrtimit të kujdesshëm të ndikimit mjedisor të zhvillimit të ri. Sipas të dhënave nga Agjencia Kombëtare e Planifikimit dhe Zhvillimit, sipërfaqja totale e tokës për kryeqytetin e ri do të jetë rreth 2,561 kilometra katrorë, pothuajse e gjithë e konvertuar nga zona pyjore.
Indonezia zotëron pjesën më të madhe të Borneos, ishullit të tretë më të madh në botë, ku Malajzia dhe Brunei mbajnë secila pjesë të rajonit të saj verior.
Sri Mulyani, Ministri i Financave i Indonezisë, ka thënë në një konferencë për shtyp të martën se do të ketë pesë faza të zhvillimit në kryeqytetin e ri.
“Faza e parë pritet të fillojë në vitin 2022 dhe të zgjasë deri në vitin 2024, me zhvillimin që pritet të zgjasë deri në vitin 2045”, ka theksuar Monoarfa.
Vlerësimet e mëparshme kanë thënë se projekti ambicioz ka të ngjarë të kushtojë rreth 32 miliardë dollarë, raportoi CNN Indonesia.
