Kina ka arritur një marrëveshje të fshehtë me Kubën për të krijuar një stacion përgjimi elektronik në ishull afërsisht 160 km nga Florida. Kjo u bë e ditur nga Wall Street Journal të enjten, por Shtëpia e Bardhë dhe Pentagoni shfaqën dyshime për këtë raportim.
“Një stacion i tillë spiun do t’i lejonte Pekinit të mbledhë komunikime elektronike nga SHBA-ja juglindore, e cila strehon shumë baza ushtarake amerikane, si dhe të monitorojë trafikun e anijeve”,- raportoi gazeta, duke cituar zyrtarë amerikanë të njohur me materialet e klasifikuara.
Selia e Komandës Qendrore të SHBA-së është e vendosur në Tampa. Fort Liberty, dikur Fort Bragg, baza më e madhe ushtarake amerikane, është në Karolinën e Veriut.
“Vendet kanë arritur një marrëveshje në parim, thanë zyrtarët, pasi Kina ka për t’i paguar Kubës “disa miliardë dollarë” për të lejuar stacionin e përgjimit”-, sipas Journal.
“Ne e kemi parë raportin. Nuk është i saktë”, tha për Reuters John Kirby, zëdhënës i Këshillit të Sigurisë Kombëtare të Shtëpisë së Bardhë. Por ai nuk specifikoi se cila pjesë ishte e pasaktë.
Ai tha se Shtetet e Bashkuara kanë pasur “shqetësime reale”, në lidhje me marrëdhëniet e Kinës me Kubën dhe po e monitorojnë atë nga afër.
Gjenerali i brigadës Patrick Ryder, një zëdhënës i Departamentit të Mbrojtjes së SHBA-së, tha: “Ne nuk jemi në dijeni që Kina dhe Kuba po zhvillojnë një lloj të ri stacioni spiun”.
Një zëdhënës i ambasadës kineze në Uashington tha: “Ne nuk jemi në dijeni të rastit dhe si rezultat nuk mund të japim një koment tani.”
Qeveria kubane nuk iu përgjigj një kërkese për koment. Por diplomati veteran kuban, Jose Cabanas, ish-ambasador në SHBA, shkroi në një postim në Tëitter se Uashingtoni “po përpiqet të demonizojë përsëri Kubën.” Ai nuk dha hollësi.
Marrëveshja mes dy rivalëve ndaj amerikës, që qeverisen nga komunistët, ka shkaktuar alarm në administratën e presidentit Joe Biden, tha gazeta, duke e paraqitur si një kërcënim të ri pranë brigjeve të Amerikës.
Gazeta tha se zyrtarët amerikanë nuk pranuan të japin më shumë detaje në lidhje me vendndodhjen e propozuar të stacionit të përgjimit ose nëse ndërtimi kishte filluar.
Marrëveshja e raportuar vjen pasi Uashingtoni dhe Pekini po ndërmarrin hapa në tentativë për të zbutur tensionet që u rritën pasi një balonë e dyshuar kineze si spiune kaloi nëpër Shtetet e Bashkuara, përpara se ushtria amerikane ta rrëzonte atë në brigjet e saj lindore në muajin shkurt.
Marrëdhëniet janë përkeqësuar për shkak të mosmarrëveshjeve që variojnë që nga aktiviteti ushtarak në Detin e Kinës Jugore dhe afër Tajvanit, të drejtat e njeriut në Pekin, si dhe konkurrenca teknologjike.
“Ne kemi pasur shqetësime reale për marrëdhëniet e Kinës me Kubën dhe kemi qenë të shqetësuar që nga dita e parë e administratës për aktivitetet e Kinës në hemisferën tonë dhe në mbarë botën”,- tha Kirby nga Shtëpia e Bardhë.
Senatori amerikan Bob Menendez, kryetar demokrat i Komitetit të Marrëdhënieve me Jashtë të Senatit tha se nëse raporti është i vërtetë, ai do të ishte “një sulm i drejtpërdrejtë ndaj Shteteve të Bashkuara”.
“Unë shpresoj se administrata do të duhet të mendojë se si do të reagojë, nëse është e vërtetë,” u tha ai gazetarëve.
Një ish-zyrtar i inteligjencës amerikane tha në kushte anonimiteti se një stacion përgjimi kinez do të ishte një “problem i madh”, pasi shënon një zgjerim të aftësive për spiunazh nga Pekini, pasi i jep atij akses në sinjalet e inteligjencës deri në Uashington.
Nëse ndërtohet një objekt i tillë, kinezët do ta përdorin Kubën “si një plazh grumbullimi kundër Shteteve të Bashkuara”, tha Daniel Hoffman, një ish-oficer i lartë i fshehtë i CIA-s.
Megjithatë, SHBA-ja ka një histori të gjatë spiunazhi me Kinën, pranë kufijve të saj. SHBA ka përdorur Tajvanin si një vend përgjimi për kontinentin aziatik dhe rregullisht fluturon me aeroplanë spiunë në Detin e Kinës Jugore, duke zemëruar Pekinin.
Kreu i Byrosë së Sigurisë Kombëtare të Tajvanit i tha parlamentit në prill se Tajvani po kryente shkëmbimin e inteligjencës së koduar në kohë reale me partnerët Five Eyes, i cili përfshin SHBA-në.
Marrëdhëniet midis Uashingtonit dhe Havanës mbeten të tensionuara. Administrata e Biden, vitin e kaluar pjesërisht hoqi disa kufizime të epokës Trump për dërgesat dhe udhëtimet në ishull, por zyrtarët kubanë i quajtën hapat të pamjaftueshëm.
Kuba, një armik i vjetër i Luftës së Ftohtë i Shteteve të Bashkuara, ka qenë prej kohësh një vatër lojërash spiunazhi dhe spiunësh. Reuters
