Gjykata Kushtetuese do të ketë një sezon interesant në shtator, ku do t’i duhet të përballet me disa nga betejat politike që kanë ndezur parlamentin gjatë 2 viteve të fundit.
Me një urdhër të brendshëm, kryetarja e Gjykatës Kushtetuese ka njoftuar trupën e gjyqtarëve se ky institucion rifillon nga puna në 10 shtator dhe se në kalendarin e vjeshtës së parë çështja që do të marrë vëmendje menjëherë është kërkesa e 1/5 së Deputetëve të Kuvendit të Republikës së Shqipërisë, pjesë e opozitës për t’u përballur në një seancë plenare publike me objekt “Shfuqizimin e ligjit të miratuar në maj të vitit të kaluar, për administrimi e nënzonave të trashëgimisë kulturore dhe peizazhit kulturor, pjesë e Parkut Kombëtar të Butrintit, ndërmjet Ministrisë së Kulturës dhe Fondacionit për Menaxhimin e Butrintit.
Opozita pretendon se ky ligj është i papajtueshëm me Kushtetutën, ndërsa Kushtetuesja ka njoftuar si palë të interesuara Presidentin e Republikës, Këshillin e Ministrave, Kuvendin e Republikës së Shqipërisë, Kontrollin e Lartë te Shtetit, Avokatin e Popullit.
Kushtetuesja ka vendosur që këtë seance publike ta mbajë në 21 shtator.
