Afati prej një muaj tranzicion po konsiderohet si një hap pozitiv, megjithatë nga aleatët perëndimorë po konsiderohet si periudhë e pamjaftueshme.
Qeveria Federale e Gjermanisë kanë ripërsëritur kërkesën për shtyrje të vendimit për implementim. Kështu kanë konfirmuar për Gazetën Express në një përgjigje nga Ambasada e Gjermanisë në Prishtinë.
“Periudha e propozuar njëmujore e tranzicionit është një shenjë pozitive se qeveria e Kosovës është e gatshme të adresojë shqetësimet që dalin nga miratimi i nxituar i rregullores së Bankës Qendrore të Kosovës. Megjithatë, një periudhë kaq e shkurtër tranzicioni, pa përgatitur një fushatë adekuate informuese dhe ndërgjegjësuese, nuk i plotëson kërkesat e një procesi gjithëpërfshirës dhe transparent që përfshin në mënyrë adekuate njerëzit e prekur”, kanë thënë për Gazetën Express nga Ambasada Gjermane.
Sipas Berlinit zyrtar, shtyrja do t’i jepte kohë Kosovës që të përgatisë në mënyrë adekuate fushatën e nevojshme informuese dhe ndëregjegjësuese dhe të atresojë çështjen se si pagesat në mes Serbisë dhe Kosovës lehtësohen dhe realizohen në mënyrë transparente.
“Ndaj, qeveria gjermane kërkon ende që të pezullohet zbatimi i rregullores. Kjo do t’i jepte qeverisë së Kosovës mundësinë që në mënyrë adekuate të përgatisë fushatën e nevojshme informuese dhe ndërgjegjësuese dhe të adresojë çështjen se si pagesat ndërmjet Serbisë dhe Kosovës mund të lehtësohen dhe procesohen në mënyrë transparente dhe me kosto efektive në përputhje me ligjet kosovare”, kanë shtuar nga Ambasada e Gjermanisë për Gazeta Express.
Gjermnia ka bërë thirrje që Serbia dhe Kosova të diskutojnë në mënyrë të përbashkët për nevojat e personave të prekur nga vendimet legjitime të Qeverisë së Kosovës. Për Qeverinë e Scholz, dialogu i Brukselit është forumi i përshtatshëm për adresimin e çështjeve të tilla.
“Si Serbia ashtu edhe Kosova duhet të diskutojnë së bashku se si të pajtohen më mirë nevojat e personave të prekur nga synimet legjitime rregullatore të qeverisë së Kosovës; dialogu i udhëhequr nga BE-ja është një forum i përshtatshëm për adresimin e çështjeve të tilla”, kanë thënë për Gazetën Express nga Ambasada e Gjermanisë.
Nga Ambasada gjermane kanë rikujtuar edhe deklaratën e zëvëndës zëdhënësit të Qeverisë Gjermane të datës 26 janar ku thoshte se “Është vendim sovran i Kosovës që të prezantojë euron si mjetin e vetëm të pagesës edhe në veri. Megjithatë, një hap kaq i gjerë me efekte të gjera për njerëzit që jetojnë atje kërkon përgatitje transparente dhe të plotë dhe komunikim gjithëpërfshirës. Kjo vlen edhe për sa i përket përfshirjes së hershme të partnerëve evropianë dhe ndërkombëtarë të Kosovës. Shumë njerëz në veri të Kosovës deri më tani kanë qenë të varur nga dinari serb. Në disa raste, pagat, pensionet dhe përfitimet e tjera paguhen me dinarë. Prandaj i bëjmë thirrje Kosovës që të shtyjë datën e prezantimit derisa të gjendet një zgjidhje e qëndrueshme”.
