Kryeministri britanik Sir Keir Starmer dhe kancelari gjerman Friedrich Merz do të formalizojnë një marrëveshje që angazhon të dy vendet për ndihmë të ndërsjellë në rast sulmi.
Ky hap historik vjen në kuadër të përpjekjeve për të forcuar aleancat strategjike evropiane, ndërsa traktati pritet të jetë elementi kryesor i vizitës së Merz në Londër.
Vizita e Kancelarit gjerman Friedrich Merz pason takimin e kryeministrit britanik Sir Keir Starmer me presidentin francez Emmanuel Macron dhe do të pasohet nga një takim i planifikuar i Starmer me Donald Trump në Skoci, në kuadër të përpjekjeve për të forcuar lidhjet transatlantike dhe evropiane.
Marrëveshja shihet si pjesë e një boshti të ri bashkëpunimi mes Britanisë, Francës dhe Gjermanisë, që në Ëhitehall përshkruhet si “aleanca trekëndore”.
Pak ditë më parë, kryeministri Starmer ra dakord për thellim bashkëpunimi edhe me presidentin francez Emmanuel Macron në fushën e mbrojtjes bërthamore, duke e cilësuar këtë zhvillim të një rëndësie të barabartë me marrëveshjen për menaxhimin e emigracionit.
Ndërkohë, në një shenjë tjetër të intensifikimit të diplomacisë evropiane, Kryeministri Starmer pritet të takohet edhe me Donald Trump gjatë një vizite të tij private në Skoci.
Të gjitha këto lëvizje ndodhin në një kontekst global me kërcënime të reja sigurie dhe nevojë për unitet më të madh mes aleatëve perëndimorë.
Traktati shihet si simbol i afrimit të Britanisë me Evropën, në një kohë kur siguria kontinentale sfidohet nga një Rusi gjithnjë e më agresive.
Të tre vendet kanë rritur ndjeshëm shpenzimet e mbrojtjes që nga kthimi i Donald Trump në Shtëpinë e Bardhë në janar, duke e vënë në dyshim angazhimin afatgjatë të SHBA-së ndaj sigurisë evropiane.
Marrëveshja që do të shpallet këtë javë do ta bëjë gjithashtu më të lehtë për fëmijët gjermanë të udhëtojnë në ekskursione shkollore në Britani, duke forcuar lidhjet kulturore dhe arsimore midis vendeve.
Si Mbretëria e Bashkuar ashtu edhe Gjermania janë tashmë anëtare të NATO-s, Neni Pesë i së cilës thotë se një sulm ndaj një anëtari konsiderohet sulm ndaj të gjithëve.
Nuk është e qartë se çfarë saktësisht ofron angazhimi i ri dypalësh përtej këtij premtimi.
Ekspertët e kanë vlerësuar si një marrëveshje simbolike dhe se sa ngushtë janë të lidhura interesat e sigurisë gjermane dhe britanike përballë një Rusie ekspansioniste.
