Ish-zyrtar i lartë i administratës amerikane, James Rubin ka vazhduar me dëshminë e tij në Dhomat e Specializuara në Hagë.
Gjatë marrjes në pyetje nga avokati kryesor i Thaçit, Luka Mishetiq, zyrtari amerikan theksoi se ish-presidenti i Kosovës nuk ishte ai që kontrollonte UÇK-në.
“UÇK-ja nuk kishte njësi të organizuar, Thaçi nuk ishte në krye të saj, ishte Çeku”, tha Rubin.
Ai shtoi se Kombet e Bashkuara kanë hetuar pretendimet për ekzekutime e vrasje, mirëpo që asnjëherë nuk kanë arritur të konfirmojnë të njëjtat.
“Kombet e Bashkuara kishin bërë përpjekje për të hetuar pretendimet, mirëpo nuk kanë arritur asnjëherë që të vërtetojnë të njëjtat. Çështja e Kosovës ishte ndër çështjet kryesore me të cilën merrej atë kohë presidenti amerikan”, theksoi Rubin.
I pyetur nëse kishte dëgjuar që Thaçi kishte dhënë urdhra për vrasje, Rubin tha se “ne kishim ndihmuar shqiptarët e Kosovës, dhe na ishin shumë mirënjohës që u shpëtuam jetën”.
“Ne kuptuam që këto pretendime ishin të fabrikuara dhe synonin të cenonin raportet SHBA-Kosovë”.
Rubin shtoi se për Thaçin, Amerika ishte simbol, shtet i mirë për botën dhe se ai (Thaçi) donte mbështetjen e udhëheqjes së SHBA-së.
Pas përfundimit të pyetjeve nga avokati i Thaçit, James Rubin u pyet edhe nga avokati i Kadri Veselit, Rodney Dixon.
Dixon pyeti Rubin se kur mësoi se CIA kishte kontakt me persona të UÇK-së, konkretisht me Ramush Haradinaj.
Rubin u përgjigj duke thënë se këtë e mësoi rreth vitit 1998-1999.
“Kur shkova në Kosovë e kuptova që CIA kishte vite që kishte kontakt me Haradinajn”, deklaroi Rubin.
Gjatë marrjes në pyetje nga Dixon, prokurori i ZPS-së kundërshtonte mënyrën e pyetjeve duke thënë se nuk janë relevante.
Rubin tha se deri me hyrjen e NATO-s në Kosovë nuk kishin kuptuar se UÇK-ja nuk kishte strukturë.
Pyetje zyrtarit amerikan i parashtroi edhe avokatja e Jakup Krasniqit, Venkateswari Alagendra.
Ajo e pyeti edhe njëherë që të rikonfirmonte se Thaçi nuk ishte në gjendje të nënshkruante në Rambuje sepse i duhej të konsultohej me komandantët në Kosovë, dhe James Rubin u përgjigj me “po”.
“Thaçi ishte nga grupi i vogël. Miratimi duhej të merrej nga këta persona (komandantët), nuk e di kush ishin ata”, tha Rubin, raporton Telegrafi.
Pas kësaj për disa minuta seanca kaloi në seancë private, të mbyllur për publikun.
Avokatja Alagendra e pyeti nëse Jakup Krasniqi, Ramë Buja edhe Sokol Bashota ishin persona të moderuar brenda UÇK-së, Rubin u përgjigj me po.
Ajo e pyeti sërish rreth hetimeve nga SHBA për pretendimet për ekzekutime dhe vrasje, ku Rubin theksoi: “Nuk kemi gjetur asnjë provë që lidh me ekzekutime dhe vrasje as z.Thaçi as z.Krasniqi”.
Rubin gjithashtu shtoi se nëse jo të gjitha, shumica nga akuzat ishin të fabrikuara dhe të lidhura nga fushatat dezinformuese ruse të mbështetura nga organizata nga Rusia dhe Serbia.
Avokatja e Krasniqit përmendi edhe rastin e vrasjes në lokalin “Panda” në Pejë, mirëpo James Rubin u deklarua se “nuk jam në dijeni për këtë”.
Pas kësaj seanca ka shkuar në pushim të drekës dhe do të rifillojë në orën 14:30.
