Flori Paluçi, 33-vjeçari që mbeti i vrarë në përplasjen me armë në Manzë të Durrësit disa ditë më parë, rezulton i shpallur në kërkim ndërkombëtar nga autoritetet italiane për tentativë vrasjeje të dyfishtë në Umbertide.
Sipas mediave italiane, Paluçi kishte arritur të largohej nga Italia përpara se të arrestohej, ndërsa ishte përfshirë në një konflikt të dhunshëm në vendlindjen e tij, që përfundoi në masakër me dy viktima. Me vdekjen e tij, mbyllet edhe kapitulli i arratisjes që kishte nisur pas krimit të rëndë në qershor në Umbria.
Media italiane mbi ngjarjen:
Vritet në Shqipëri një 33-vjeçar i kërkuar për tentativë vrasje të dyfishtë në Umbertide. I arratisuri mbeti i vrarë gjatë një përplasjeje me armë në vendlindjen e tij.
Ngjarja kriminale në Umbria kishte pasur momentin e saj kyç në mbrëmjen e 19 qershorit, rreth orës 19:45, në zonën e Vernas. Aty, pranë një lokali dhe një parkingu, 33-vjeçari kishte qëlluar disa herë me armë ndaj dy bashkatdhetarëve të tij, 28 dhe 33 vjeç, banues përkatësisht në Umbertide dhe Città di Castello. Të dy personat, të plagosur rëndë, u ndihmuan menjëherë dhe u transportuan me helikopter në spitalet e Città di Castello dhe Perugia.
Hetimet e nisura menjëherë nga karabinierët e Città di Castello dhe të Njësisë Hetimore të Perugia-s, nën drejtimin e Prokurorisë së Perugia-s, çuan për pak ditë në identifikimin e autorit të dyshuar të të shtënave.
Provat e shumta dhe të qarta të mbledhura e bindën prokurorinë të kërkonte një masë sigurie, e cila u miratua nga gjyqtari hetues i Gjykatës së Perugia-s, duke urdhëruar arrestimin e tij me burg.
Megjithatë, urdhri nuk u ekzekutua kurrë. 33-vjeçari kishte arritur të arratisej nga territori italian para se forcat e rendit ta kapnin. Për këtë arsye, autoritetet gjyqësore aktivizuan kërkimet në nivel ndërkombëtar, të cilat mbetën në fuqi deri më sot.
Hetimet e agjentëve të Interpolit kanë rindërtuar tashmë kapitullin e fundit, fatal, të arratisjes së tij.
I kërkuari u përfshi në një debat të dhunshëm në Manëz në Shqipëri. Grindja u shndërrua në një përplasje me armë, që përfundoi në një tragjedi të dyfishtë: 33-vjeçari mbeti i vrarë, së bashku me një person tjetër.
Kështu mbyllet, në mënyrë dramatike, kërkimi për personin e dyshuar se kishte tentuar të vriste dy bashkatdhetarë në fshatrat e Umbrias.