Dy avionë luftarakë të Marinës së SHBA-së, F/A-18, dyshohet se kanë hyrë për rreth 40 minuta në hapësirën ajrore të Venezuelës, duke fluturuar mbi zonat më të ndjeshme energjetike të vendit, raportoi Miami Herald. Incidenti vjen në një moment kur marrëdhëniet mes Uashingtonit dhe regjimit të Nicolás Maduro-s janë përshkallëzuar ndjeshëm.
Sipas medias amerikane, avionët fluturuan mbi Gjirin e Venezuelës rreth mesditës së të martës. Por një zyrtar i mbrojtjes së SHBA-së, në kushte anonimiteti, deklaroi për AP se F/A-18-at qëndruan në hapësirë ndërkombëtare dhe kryen një “stërvitje rutinë”, të ngjashme me operacione të mëparshme që synojnë të tregojnë kapacitetin operativ të avionëve amerikanë. Zyrtari nuk pranoi të thotë nëse avionët ishin të armatosur, por këmbënguli se manovrat nuk kishin qëllim provokues.
Megjithatë, fluturimi ndodhi midis dy zonave kyçe për sektorin e energjisë venezuelase, afër Liqenit Maracaibo, vendburimi i miliarda fuçive nafte, dhe korridoreve detare ku lëvizin rregullisht cisternat e naftës. Zulia, ku ndodhet baza ajrore Maracaibo, është një nga qendrat kryesore ushtarake të vendit.
Incidenti përkoi edhe me një vizitë zyrtare në Bazën Ajrore Rafael Urdaneta, ku komandanti i Forcave Ajrore inauguroi ambiente të reja, i shoqëruar nga autoritete lokale pro-Maduros. Ndërkohë, administrata Trump ka rritur presionin ushtarak ndaj Venezuelës, duke vendosur 15–16 mijë trupa pranë ujërave territoriale dhe duke dislokuar bombardues strategjikë B-52 dhe B-1.
Po ashtu, aeroplanmbajtësja gjigante USS Gerald R. Ford ka mbërritur së fundmi në Karaibe, ndërsa ushtria amerikane ka kryer 22 goditje kundër anijeve të dyshuara për trafik droge që nga shtatori, duke shkaktuar të paktën 87 viktima. Kritikët e quajnë këtë një fushatë ekzekutimesh pa gjyq, ndërsa Kongresi kërkon publikimin e videove të paprera të sulmeve.
