Klubi i basketbollit Z Mobile Prishtina ka arritur të triumfojë në finalen e zhvilluar në Rahovec, pikërisht kundër ekipit të këtij qyteti, në konkurrencën e meshkujve.
Prishtina arriti të triumfojë në fund duke e deklasuar Rahovecin me më shumë se 30 pikë dallim. Prishtina nisi më mirë ndeshjen se ‘Vreshtarët’, të cilët edhe me mbështetjen e afër 4 mijë shikuesve nuk arritën t’i bëjnë ballë klubit më të trofeshëm kosovar.
Prishtina në çerekun e parë ishte më e mirë se Rahoveci dhe kësisoj rezultati pas përfundimit të këtij çereku ishte 21 me 14 në të mirë të skuadrës nga kryeqyteti.
Edhe në çerekun e dytë Prishtina vazhdoi avazin e vjetër duke realizuar nga çdo pozitë. Lojtarët e Prishtinës realizuan 27 pikë në këtë çerek ndërsa vendasit arritën të shënonin 18 pikë. Rezultati pas përfundimit të pjesës së parë, ishte 48 me 32 në të mirë të mysafirëve.
Kur u mendua se Rahoveci do të rikthehet, një gjë e tillë nuk ndodhi pasi në fund të çerekut të tretë, lojtarët prishtinas shpërthyen dhe këtë çerek e mbyllën në epërsi me rezultat 74:51.
Në çerekun e katër Prishtina hyri pa presion dhe siç bën zakonisht nuk e lëshon fitoren nga dora. Në fund Prishtinasit fituan me rezultat 96:60.
Kjo është hera e 15-të që Prishtina arrin ta fitojë kupën e Kosovës.
