Kancelarja gjermane, Angela Merkel i kërkoi sot Rusisë të reduktojë praninë e saj ushtarake në rajonin kufitar me Ukrainën, në një intervistë telefonike me presidentin rus Vladimir Putin.
Të dy udhëheqësit folën për “forcimin e pranisë ushtarake ruse në Ukrainën lindore”, sipas një deklarate nga qeveria gjermane dhe “kancelarja kërkoi që këto përforcime të ulen me qëllim uljen e tensioneve në rajon”.
Kremlini, nga ana e tij, tha në një deklaratë se Putin dhe Merkel “janë të shqetësuar për përshkallëzimin e tensioneve” në konfliktin në Ukrainën lindore.
Të dy udhëheqësit bënë kështu thirrje “për përmbajtje dhe aktivizim të procesit të negociatave”, sipas Moskës, ndërsa bisedimet e paqes të cilat bashkojnë Ukrainën dhe Rusinë, me ndërmjetësimin franko-gjerman, janë në një ngërç.
