Miliona familje në Mbretërinë e Bashkuar janë vënë në alarm pasi kompania e furnizimit me ujë South East Water paralajmëroi se mund të përballet me mungesë fondesh nëse nuk siguron financime të reja.
Kompania, e cila furnizon me ujë rreth 2.3 milionë klientë në juglindje të Anglisë, njoftoi se ka pësuar një humbje prej 55 milionë paundësh pas një sërë ndërprerjesh të furnizimit gjatë dimrit, të cilat lanë dhjetëra mijëra familje pa ujë të rrjedhshëm.
Sipas drejtuesve të kompanisë, fondet aktuale janë të mjaftueshme për të vazhduar operimin deri në korrik të vitit 2027, por pas kësaj periudhe do të nevojiten burime të reja financimi për të garantuar vazhdimësinë e aktivitetit.
Njoftimi ka ngritur shqetësime për të ardhmen e një prej kompanive kryesore të ujësjellësit në Angli, ndërsa autoritetet dhe konsumatorët po ndjekin me vëmendje zhvillimet. Megjithatë, kompania theksoi se shërbimi i furnizimit me ujë vazhdon normalisht dhe nuk ka rrezik të menjëhershëm për ndërprerje të furnizimit.
