Kryeministri britanik Keir Starmer ka paralajmëruar Andy Burnham që të mos ndërmarrë një sfidë të menjëhershme për udhëheqjen e Partisë Laburiste nëse fiton zgjedhjet e pjesshme në Makerfield dhe hyn në Parlament.
Duke folur nga samiti i G7, Starmer deklaroi se një garë për lidershipin do të ishte “e dëmshme për vendin” dhe theksoi se ai do të kundërshtojë çdo tentativë për ta sfiduar në krye të partisë. Ai shtoi se fokusi duhet të mbetet te zgjedhjet për kryebashkiakun e ri të Greater Manchester, të cilat pritet të zhvillohen pas dorëheqjes së mundshme të Burnham nëse ai zgjidhet deputet.
Sipas zhvillimeve politike, Burnham shihet si një figurë potenciale për të sfiduar udhëheqjen e Starmerit në rast se ai siguron një vend në Dhomën e Komunave. Kryeministri gjithashtu la të kuptohet se Burnham mund të marrë një post në kabinetin e ardhshëm të qeverisë nëse fiton në Makerfield.
Ndërkohë, deputeti laburist Wes Streeting ka deklaruar se është i gatshëm të mbështesë hapjen e një gare për lidership, duke theksuar se “pasiguria dhe paraliza” brenda partisë duhet të adresohen shpejt pas zgjedhjeve.
Debati vjen në një moment tensioni të brendshëm në Partinë Laburiste, ndërsa rezultati i zgjedhjeve në Makerfield pritet të ketë ndikim të drejtpërdrejtë në balancat e pushtetit brenda partisë.
