Më shumë se 100 milionë njerëz janë detyruar të ikin nga konflikti, dhuna dhe persekutimi. Një shifër rekord kjo sipas Agjencisë së Kombeve të Bashkuara për refugjatët, e cila e cilëson këtë një “rekord befasues”.
“Numri i njerëzve të detyruar të ikin nga konflikti, dhuna, shkeljet e të drejtave të njeriut dhe persekutimi tani ka kaluar kufirin befasues prej 100 milionë për herë të parë një rekord, i nxitur nga lufta në Ukrainë dhe konflikte të tjera vdekjeprurëse”, tha UNHCR në një deklaratë.
“Njëqind milionë është një shifër e zymtë dhe alarmante në të njëjtën kohë. Është një rekord që nuk duhet të ishte vendosur kurrë”, tha Komisioneri i Lartë i OKB-së për Refugjatët, Filippo Grandi.
“Kjo duhet të shërbejë si një thirrje zgjimi për të zgjidhur dhe parandaluar konfliktet shkatërruese, për t’i dhënë fund persekutimit dhe për të adresuar shkaqet themelore që detyrojnë njerëzit e pafajshëm të largohen nga shtëpitë e tyre.”
UNHCR tha se lufta në Ukrainë ka zhvendosur 8 milionë brenda vendit këtë vit dhe më shumë se 6 milionë lëvizje refugjatësh nga Ukraina janë regjistruar. Ky numër është nxitur gjithashtu nga “valët e reja të dhunës” ose konflikti në Etiopi, Burkina Faso, Myanmar, Nigeri, Afganistan dhe Republikën Demokratike të Kongos.
