Çështja e liberalizimit të vizave për Kosovën do të jetë në rend të ditës në takimin e grupit të punës të Këshillit Evropian, më 13 tetor, konfirmojnë burimet diplomatike të BE-së në Bruksel, të cituara nga Radio Evropa e Lirë.
Presidenca çeke e BE-së tashmë u ka dërguar letër shteteve anëtare për t’i paralajmëruar lidhur me diskutimet për këtë temë. Në letrën që është parë nga Evropa e Lirë, shprehet qartë dëshira e Çekisë që të gjitha vendet e BE të arrijnë konsensus për mbështetjen e liberalizimit të vizave.
“Qasja gjeopolitike e BE-së ndaj Ballkanit Perëndimor është e domosdoshme. Rajoni ka nevojë për sinjal të qartë se procesi i zgjerimit është i besueshëm dhe se BE-ja është e gatshme t’i shpërblejë përpjekjet për reforma që bëjnë vendet e Ballkanit Perëndimor”.
Presidenca çeke përmend liberalizimin e vizave për Kosovën si shembull se si BE-ja mund të rrisë besueshmërinë në rajon, duke kujtuar se ky është një proces i vonuar.
Diskutimi i parë në grupin punues të Këshillit për liberalizimin e vizave pritet të zhvillohet vetëm një ditë pasi Komisioni Evropian të miratojë dhe publikojë paketën vjetore të zgjerimit, e cila do të shoqërohet edhe me raportet individuale të progresit për vendet e përfshira në këtë proces.
Sakaq me 6 tetor do të mbahet takimi i parë mes liderëve të shteteve që supozohet të jenë pjesë e bashkësisë politike europiane, e propozuar nga Macron e që po shihet nga disa, si një alternativë e përkohshme e zgjerimit.
Ftesa për pjesëmarrjen e takimit që do të mbahet në Pragë u ka shkuar 6 shteteve të Ballkanit, dhe të gjitha shteteve europiane që janë jashtë BE, përveç Rusisë dhe Bjellorusisë
