Tre persona janë arrestuar dhe 1 tjetër është shpallur në kërkim pasi u kapën duke transportuar 13 emigrantë të paligjshëm kundrejt pagesës drejt vendeve të BE-së.
Sipas njoftimit të policisë, E. K., 26 vjeç, i cili ishte nën masë sigurie “Detyrim paraqitjeje”, E. B., 23 vjeç dhe B. K., 43 vjeç, të tre banues në Tiranë u kapën me 13 emigrantë të paligjshëm në shpërndarë në makinën e secilit, ndërsa shtetasi L. C., 29 vjeç, banues në Tiranë, monitoronte rrugën për të shmangur policinë. Ky i fundit braktisi makinën me të cilin lëvizte ndërsa Policia vijon punën për kapjen e tij.
Ndalimi i shtetasve u bë në aksin rrugor Gjirokastër-Sarandë, në vendin e quajtur “Ish-miniera e Kripës”, Finiq.
“Të 4 këta shtetas bashkëpunonin me njëri-tjetrin, për të kryer transportimin kundrejt pagesave, të 13 emigrantëve, me qëllim kalimin e kufirit në mënyrë të kundërligjshme.
Shtetasit E. K., E. B. dhe B. K. drejtonin përkatësisht automjetet tip “BMW”, “Volksawagen” dhe “Skoda”, me të cilët transportoheshin emigrantët, ndërsa shtetasi L. C. (i shpallur në kërkim pas identifikimit nga shërbimet e Policisë) lëvizte me automjetin e tij, me qëllim monitorimin e rrugës, për të shmangur shërbimet e Policisë” thuhet në njoftimin e policisë.
Policia sekuestroi në cilësinë e provës materiale 4 automjetet e përdorura nga këta shtetas për këtë veprimtari kriminale, si dhe celularët e tyre.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme, për veprën penale “Ndihma për kalim të paligjshëm të kufijve”, kryer në bashkëpunim.
