Një grup aktivistësh të “Greenpeace” në shenjë proteste ndaj vendimit të kryeministrit britanik Rishi Sunak për të mbështetur një rritje të konsiderueshme të shpimeve të naftës dhe gazit në Detin e Veriut, sot u ngjitën në çatinë e rezidencës së tij në Yorkshire, transmeton Anadolu.
Protestuesit u ngjitën në çatinë e rezidencës së kryeministrit dhe e mbuluan atë me një “mbulesë të zezë si vaj” që mbulonte afërsisht 200 metra katrorë. Siç mund të shihet në një foto të shpërndarë nga “Greenpeace” në platformën X, e njohur më parë si Twitter, dy aktivistë zbuluan një pankartë ku shkruhej “Rishi Sunak – Fitimet e naftës apo e ardhmja jonë?”.
Sunak nuk është i pranishëm në rezidencë pasi është nisur për pushime familjare në SHBA dhe pritet të qëndrojë jashtë vendit rreth 10 ditë.
Britania e Madhe ka nisur raund të ri të lëshimit të qindra licencave të kërkimit të naftës dhe gazit në Detin e Veriut për të rritur sigurinë dhe pavarësinë e energjisë, duke injoruar thirrjet e aktivistëve mjedisorë dhe të OKB-së për të ndaluar zhvillimin e projekteve të reja të karburanteve fosile.
Njoftimi i kryeministrit britanik vjen ndërsa shkencëtarët e OKB-së dhe aktivistët mjedisorë u bëjnë thirrje qeverive në mbarë botën të përshpejtojnë kalimin nga lëndët djegëse fosile në burimet e rinovueshme pas një vere me temperatura të larta rekord, thatësirës dhe përmbytjeve të lidhura me ndryshimet klimatike.
