Kryetari i Partisë Demokratike Sali Berisha u shpreh sot në një konferencë për mediet se Europa është e vendosur që Shqipëria të bëjë zgjedhje të lira.
Duke iu referuar seancës dëgjimore të Komisionit të Jashtëm në Parlamentin Europian për Shqipërinë në lidhje me zgjedhjet dhe klimën parazgjedhore, Berisha tha se “nuk ka ndodhur kurrë në historinë 34-vjeçare që këto institucione të kenë në axhendën e tyre Shqipërinë, problematikat e saj madhore, zgjedhjet e dhunuara sistematikisht, krimin e organizuar që ka kapur majën e shtetit, terrorin politik dhe shtypjen e opozitës”.
“U them shqiptarëve me bindjen më të thellë, Europa është e vendosur t’i japë atë që meriton të gjithë atyre që kërkojnë t’i privojnë shqiptarët nga e drejta e votës së lirë dhe tentojnë t’u kontrollojnë atyre vullnetin dhe ky është një ogur i bardhë shumë për çdo shqiptar”, shpreh Berisha.
Sipas Berishës, dje në seancën kushtuar Shqipërisë “pati debate të gjera, pati debate aktive, në të cilat u denoncuan dhe u shpreh shqetësimi i madh para së gjithash për zgjedhjet”.
Berisha tha se “në Bruksel u denoncua me zë të lartë shkelja e vendimeve të Gjykatës Kushtetuese si një gjë e pakonceptueshme, si një gjë e cila nënkupton asgjësimin e shtetit ligjor”.
“Në qoftë se vendimet e gjykatës më madhore të vendit nuk zbatohen, kjo në njëfarë mënyre përbën një grusht shteti, ku padrinoja e Shqipërisë ka marrë të gjitha pushtetet”, u shpreh Berisha.
Berisha tha më tej se “Shqipërisë iu kërkua që të mos kërcënojë opozitën, të respektojë rregullat. Unë mendoj se kjo ishte një mbështetje e jashtëzakonshme për çdo qytetar shqiptar”.
