Një operacion i policisë belge ka përfunduar me arrestimin e një të riu shqiptar që përpiqej të shpëtonte një ngarkesë prej 4 kilogramësh kokainë të pastër. Ngarkesa kishte një vlerë tregu të afërt me 200 mijë euro nëse do të ishte shitur e gjitha.
Operacioni ndodhi më 3 Shtator në zonën e Rivierenland në Mechelen.
Sipas raportimeve të “RTV”, oficerët e policisë, të cilët kishin marrë një sinjalizim për një automjet të dyshuar në Koningin Astridlaan, ndjekën makinën deri në Brusselsesteenweg. Kur ata i kërkuan shoferit të ndalonte për një kontroll, ai hodhi një çantë nga dritarja e makinës dhe vazhdoi të ikte me shpejtësi.
Çanta që u hodh nga dritarja përmbante 4 kilogramë kokainë të paketuar në dy pako të mëdha, me nga dy kilogramë secila. Pas një ndjekjeje, policia arriti ta ndalonte makinën dhe të arrestonte 22-vjeçarin shqiptar. Mjeti, dy celularë dhe një shumë e konsiderueshme parash, gjithashtu u sekuestruan.
Burri tani është nën arrest dhe do të përballet me akuzat për trafik narkotikësh. Ai është dërguar në gjykatë dhe i është vendosur masa e “arrest me burg” deri në përfundimin e hetimeve.
